Dl 2022 él gnü registré feter 40 mil. de obliteraziuns sön i mesi dl trasport publich tl Südtirol, trëi agn denant n’êl sté 54,3 mil. Ci che al é doia.
La ferata dla Val Venosta che â indô metü man da jí dl 2005 á porté pro tl Südtirol ala pröma mudaziun dla mobilité: Jí cun la ferata jô fora de nia indô de moda. Spó él gnü lauré fora les linies di bus y dla ferata te döta la provinzia. Le Südtirol Takt y le Südtirol Pass á fat stluté sö le numer dles porsones che s’anüza di mesi dl trasport publich cun valurs dër alc dl 2018 y 2019. I lockdown porvia dl Corona ti agn 2020 y 2021 á archité chësc fenomen.
La pandemia dl Covid19 é sëgn passada, le smartworking y le homeoffice é romagnüs: tröpes porsones che laora s’anüza inant dla poscibilité da lauré val’ dis da ciasa. I iadi te ofize ne vá insciö nia plü debojëgn. Y chël vëigon sambëgn ince dai numeri di passajiers: Pro le trasport local dla ferata él gnü registré l’ann passé 7,7 mil. de obliteraziuns, dan le "Corona“ n’êl ciamó gnü registré 10 mil. Pro la ferata dla Val Venosta sënton chiló les conseguënzes di tröc iadi che ara é gnüda stlüta porvia de laurs de eletrificataziun. Por gauja de defec tecnics dl’infrastrotöra él ti ultimi agn ince tomé fora plülere sovënz les ferates dla linia de Puster.
I feter 2 mil. de obliteraziuns pro la ferata dl Renun y la ferata dla Mendola é romagnüs anfat.
I bus vëgn atualmënter adatá
Plü basc co denant mo manco da dí á i numeri dles obliteraziuns pro i bus: dl 2022 él sté 29,5 mil. de registraziuns y dl 2019 nen él sté 42,2 mil. Öna na rajun é che i bus ciafa na tecnologia nöia por i sistems de informaziun y ticketing. I aparac de obliteraziun bröms da sëgn é bele da n pez massa vedli y ne vëgn gnanca plü fac, porchël nen ciafon gnanca plü. Ti proscimi mëisc gnarál metü sön düc i bus i aparac nüs, a chësta moda arunse indô numeri plü complec.
Val’ descrepanzes sarál tres: Mituns y mitans sot i 6 agn n'adorará gnanca tl dagní na cherta y les chertes online mëss ma gní obliterades un n iade, ince sce ares reverda de plü iadi o döra plü dî.