L’areal dla staziun a Sigmundskron se presentëia sëgn sciöche punt d’incrujada modern cun plazes da parché nöies por i auti, i motors y les rodes; insciö él sambëgn ince plü saurí da passé ala mobilité publica.
Dantadöt por les porsones dl raiun da Balsan y iadelá dal Adesc (Überetsch) che tol la ferata ciafa sëgn la staziun de Sigmundskron na majera importanza sciöche punt d’incrujada strategich: chiló vëgnel registré cina a 9.000 timbradöres al mëis. Sot ala gestiun dla STA - Strotöres Trasport dl Südtirol SpA él ti ultims mëisc gnü restrotoré y conzepí danü döt l’areal y sëgn é chisc gragn laurs de costruziun gnüs stlüc jö.
Insciö él a desposiziun dla jënt indöt 110 posć da parché l’auto, sis de chisc por porsones cun dejabilité, trëi por umes o peri cun bagheli y dui por i veicui dl car-sharing. Al é sambëgn ince lercs aposta por rodes y scooter. L’assessur por la mobilité Daniel Alfreider spliga: "La plaza da parché nöia é gnüda realisada a na moda che les pendolares y i pendolars pó gní cun la roda, le bus o l’auto cina ala staziun y da dailó inant pói comodamënter tó la ferata che vá a Maran o a Balsan."
Ti ultims mëisc él gnü tut demez les barieres architetoniches sön la plaza da parché de Sigmundskron y le flus dl trafich é gnü regolé danü. Le rondel da denant y la plaza prinzipala é gnüs fac danü. Al é ince gnü realisé n conzet nü por l’iluminaziun y de plü sperses vërdes che cheriëia n ambiënt atraënt y da sté saurí.